Türkmenistanyň konstitusiýa hukugy dersiniň maksady - dersiň özleşdiriliş prosesinde konstitusiýa hukugyny hukuk pudagy, hukuk ylmy we predmet höküminde özleşdirmek bilen onuň kadalarynyň ulanyş metodlaryny, döwletiň konstitusion gurluşy, döwlet häkimiýetiniň we dolandyryş edaralarynyň sistemasy, ýerli häkimiýetiň we ýerli öz-özüňi dolandyryş edaralary hem-de olaryň biri-biriniň arasyndaky gatnaşyklary, adamyň we raýatyň konstitusion hukuklary, azatlyklary, borçlary, jogapkärçilikleri we ş.m. meseleleri öwrenmekdir. Talyplara we diňleýjilere döwletiň konstitusion gurluşynyň esaslary, gurluşy, dolandyryşy, düzgüni, häkimiýet şahalary, nyşanlary boýunça düýpli bilim bermek we döwletiň dolandyryş edaralarynyň dolandyrylyşynyň ähli ugurlaryny öwretmek bilen döwlet gullugynyň islendik ulgamynda we döwlete dahylly bolmadyk dürli wezipelerde işlemegiň endigini bermekden hem-de hukuk medeniýetini ýokarlandyrmakdan ybaratdyr.
Administratiw hukugy dersiniň maksady – diňleýjilere we talyplara döwlet dolandyryşynyň döwletiň işiniň bir bölegidigini, ýerine ýetiriji häkimiýetiň döwlet dolandyryşyny amala aşyrmagynyň hukuk, guramaçylyk esaslaryny öwretmekden ybaratdyr. Ýagny döwlet dolandyryşynyň umumy düşünjesi we onuň aýratynlyklary, administratiw hukugynyň predmeti, administratiw hukuk kadalary, gatnaşyklary, şu hukugyň subýektleri, olaryň aýratynlyklary we hersiniň hukuk ýagdaýlary, administratiw jogapkärçiligi, administratiw hukuk bozulmalarynyň düzümi we görnüşleri, pudaklaýyn ugurlara bölünişi we ulanylyşy baradaky düşünjeleri öwredýär.
Ýerli häkimiýet hukugy dersiniň maksady – ýerine ýetiriji häkimiýetiň ýerli edaralarynyň, döwlet häkimiýetiniň ýerli wekilçilikli edaralarynyň we ýerli öz-özüňi dolandyryş edaralarynyň gullukçylarynyň gündelik işleri, wezipeleri bilen baglanyşykly milli kanunçylygy, kadalaşdyryjy hukuk namalary ýokary derejede öwretmekden we düşündirmekden ybaratdyr.
Türkmenistanyň döwletiniň we hukugynyň taryhy dersiniň maksady – Türkmenistan döwletiniň we hukugynyň taryhy örän wajyp hukuk ylmy bolmak bilen, türkmen halkynyň geçmişde döreden döwletleri, olaryň gurluşy, taryhy döwürlerini we hukuk esaslaryny özünde jemleýär.
Döwletiň we hukugyň nazaryýeti dersiniň maksady – hukuk ylmy hökmünde, döwletiň we hukugyň döremeginiň, hereket etmeginiň we ösmeginiň özboluşly aỳratynlyklaryny hem kanunalaỳyklyklaryny, döwletiň we hukugyň özara arabaglanyşygyny, hukuk dörediş hem hukuk ulanyş işini öwrenýän hukuk pudagy bolup onuň esasy maksady hukugy hem-de beýleki jemgyýetçilik ylymlaryny öwrenijiler üçin nazaryýet esaslaryny özünde jemlemekden ybaratdyr.
Jenaýat hukugy dersiniň maksady – jenaýat hukugy pudagyna degişli kanunlar we beýleki kadalaşdyryjy namalar bilen ýakyndan tanyşdyrmakdan, olaryň aýratynlyklaryny düşündirmekden ybaratdyr. Ýurtda bolup geçýän ýa-da ýol berilýän dürli hukuk bozulmalaryň, jenaýatçylykly etmişleriň öňüni almak, duýdurmak, aradan aýyrmak, şeýle-de ýurtda asudalygy, agzybirligi, jebisligi we kanunçylygyň kadalaryny mundan beýläk has-da pugtalandyrmak, Türkmenistanyň Jenaýat kodeksinden gelip çykýan ýörelgeleri, wezipeleri durmuşa ornaşdyrmak, onuň gaýry hukuklar bilen hyzmatdaşlygyny kämilleşdirmek, jenaýat kanunçylygy tarapyndan goralýan raýatlaryň konstitusion şahsy hukuklaryny, bähbitlerini, at-abraýlaryny, mertebelerini, azatlyklaryny dürli hukuk bozulmalardan, şonuň ýaly-da jenaýatçylykly hyýanatçylykdan gorap saklamak, jenaýatçylykly ýollar bilen döwlete we raýatlara ýetirilen ruhy, ahlak we maddy zyýanlaryň öwezini doldurmak hem-de iş kesilenler bilen terbiýeçilik-düşündiriş işlerini alyp barmak we olary dogry ýola salmak meselelerini giňden öwrenmek.
Maliýe we bank hukugy dersiniň maksady – döwletiň öňünde duran wezipeleri ýerine ýetirmek üçin onuň maliýe işiniň, maliýe ulgamynyň hukuk esaslaryny özleşdirmek bolup durýar. Dersi özleşdirmek üçin Türkmenistanda maliýe we bank gatnaşyklarynyň hukuk esaslaryny kesgitleýän kanunlar we kanundan gelip çykýan hukuk namalary, döwletiň býujet-maliýe, salgyt, pul we karz syýasatynyň esaslary, döwletimizde alnyp barylýan maliýe işi barada, bazar ykdysady gatnaşyklarynyň, elektron maglumatlar, sanly ykdysadyýet ulgamlarynyň hukuk taýdan kadalaşdyrylyşy, şeýle hem maliýe hukugynyň orny, predmeti, ulgamy we ýörelgeleri barada öwredilýär.
Halkara hukugy dersiniň maksady – diňleýjilere we talyplara halkara hukugy, halkara guramalarda agzalyk we halkara konferensiýalar barada düşünje bermekden ybarat bolup durýar. Ýagny halkara hukugynyň taryhy, häzirki zaman ugurlary, çeşmeleri, obýekti we subýekti, esasy ýörelgeleri barada düşünje bermekden ybaratdyr. Döwletiň häkimiýet edaralarynyň daşary gatnaşyklara bolan hukugy, şonuň bilen birlikde bu hukugyň esasyny emele getirýän diplomatik we konsullyk hukugy barada maglumat bermek bolup durýar.
Hukugyň filosofiýasy dersiniň maksady – Hukugyň filosofiýasy adatça esas goýujy, hünär derejeli hukukçylaryň geljekki hünär işleriniň ugruna bagly bolmazdan olaryň taýýarlanylmagynda möhüm orny eýelemek bilen bir wagtda filosofiýanyň we hukuk ylmynyň çatrygynda hukuk ulgamynda has iri pudaklaryň biri bolup durýar. Hukuk dörediji ýa-da hukuk ulanyjy tejribesi bilen meşgullanmak bilen islendik hukukçy ol ýa-da beýleki derejede döwlet, jemgyýet we beýleki subýektler bilen arabaglanyşykda bolýar we olar bilen dürli gatnaşyklara girýär, bu gatnaşyklar şol sanda hukugyň filosofiýasynyň prizmasy arkaly seredilýär.
Beýleki esasy dersler bilen bir hatarda hukugyň filosofiýasyny öwrenmegiň zerurlygy we ähmiýeti onuň häsiýeti we onuň öwrenýän jemgyýetde we umuman döwletde emele gelýän jemgyýetçilik gatnaşyklarynyň möhümligi bilen kesgitlenilýär.
Sanly dolandyryşyň hukuk üpjünçiligi dersiniň maksady - Sanly dolandyryşyň kadalaşdyryjy-hukuk esaslary, maglumat we kommunikasiýa tehnologiýalary ulanmak pudagynyň ösmegi bilen baglanyşykly ýüze çykýan hukuk medeniýetiniň hem-de hukuk pikirlenmäniň ýokary derejesi, hukuk integrasiýasynyň we sanly dolandyryşyň esasy ýörelgeleri barada we şol sanda maglumat hukugynyň we maglumat howpsuzlygynyň umumy nazaryýeti boýunça meseleleri hakynda ulgamlaýyn düşünjesini özleşdirmekden ybaratdyr.
Daşary ýurt döwletleriniň konstitusiýa hukugy dersiniň maksady – dersi öwrenmegiň aýratyn häsiýetli tarapy daşary ýurtlarda häzirki zaman döwlet gurluşynyň tejribesi we kanunçylygy yzygiderli ösdürilýändigi we täzelenip durulýandygy bilen şertlendirilendir. Şoňa görä-de şu dersiň esasy maksady daşary ýurtlarynyň hukuk ulgamynyň esaslarynyň üýtgedilmeginiň, döwletleriň konstitusiýasynyň häzirki zaman meseleleriniň umumy häsiýetlerini öwrenmekden, şeýle-de käbir daşary ýurt konstitusiýa hukugynyň aýratynlyklaryna üns bermekden, täze edebiýatlary we degişli kadalaşdyryjy namalary hödürlemekden ybaratdyr.
Administratiw önümçilik hukugy dersiniň maksady - döwlet gullukçylaryny taýýarlamakda, hünär derejesini ýokarlandyrmakda okadylýan täze döredilen dersleriň biridir. Ol kada bolşy ýaly, Türkmenistanyň hukuk pudaklarynyň arasynda täze dörän pudaklaryň biri bolup durýar we hünärmenleri, hukukçylary taýýarlamakda, olaryň haýsy hünär işi çygrynda işlejekdigine garamazdan, esasy orunlaryň birini tutýar. Islendik hünärmen, hukukçy kanun döredijilik we hukuk ulanyş tejribesi bilen meşgullanyp, belli bir derejede döwlet bilen gatnaşyklarda bolýar, onuň bilen dolandyryş gatnaşyklaryna girişýär. Bu gatnaşyklar administratiw önümçilik hukugynyň kadalary bilen düzgünleşdirilýär.
Ylmy-barlag usullary dersiniň maksady – dersiň maksatnamasynda nazaryýet-hukuk ylymlarynyň, bu ugurdan alnyp barylýan ylmy seljermeleriň nukdaýnazaryndan iň ähmiýetli we wajyp bolan ylmy işlerden hem çeşmelerden, olarda beýan edilen maglumatlardan we düşünjelerden gysgaldylyp peýdalanyldy. Şonuň üçin hem, ylmy barlag işleriniň usullary barada umumy nazaryýet düşünjeleriniň, garaýyşlarynyň gysby hem gysga jemlemesi hökmünde garamak bolar. Şonuň bilen baglylykda-da, bu ders talyplara ylmy-barlag usullaryny özleşdirmeklige ýardam berer diýip hasaplaýarys.
Ylmy-barlag seminary dersiniň maksady - talyplary ylmyň esasy düzgünleri we ylmy-barlag işiniň esaslary bilen tanyşdyrmakdan hem-de olaryň hukuk öwreniş çygrynda ylmy-barlag işine taýýarlygyny üpjün edýän bellenen ukyplaryny (başarnyklaryny) ösdürmekden ybarat bolup durýar.
Maliýe hukugy dersiniň maksady - maliýe hukugynyň esasy nazaryýet düzgünleri we kadalary bilen tanyşdyrmak; maliýe hukugynyň ykdysadyýetiň bazar gatnaşyklaryna “hyzmat edýän” hukuk pudagy hökmünde, onuň düzgünleşdiriji ähmiýetini açyp görkezmek; döwlet maliýesiniň derwaýys ykdysady we hukuk meselelerini, maliýanyň döwlet tarapyndan düzgünleşdirmesiniň ýörelgelerini, usullaryny we görnüşlerini, döwlet maliýesiniň hereket etmeginiň meselelerini we bazar ykdysadyýeti şertlerinde döwletiň maliýe ulgamyna täsir edýän dürli ýagdaýlary (faktorlary) öwrenmek; maliýe hukugynyň esasy institutlary bolan bank, salgyt, daşary ýurt pullary (walýuta), býujet, ätiýaçlandyryş, maýa goýum ýaly institutlarynyň mazmunyny açyp görkezmek.
Ýerli öz-özüňi dolandyryş hukugy dersiniň maksady - döwlet gullukçylaryny we magistrlerini taýýarlamakda okadylýan wajyp dersleriň biridir. Ýerli öz-özüňi dolandyryş hukugy örän derwaýys okuw dersleriniň biri bolmak bilen, ol ýurdumyzyň milli hukuk ulgamynyň gurluşyndan düýpli tapawutlanýan beýleki hukuk maşgalasyna degişli hukuk ulgamly döwletleriň hukuk ulgamlarynyň aýratynlyklary baradaky nazaryýeti, garaýyşlary öwrenýän ylymdyr.
Deňeşdirme hukugy dersiniň maksady - Ýurisprudensiýa ugrunda geljekki hünär işi üçin zerur teoretiki we hukuk bilimleriniň toplumy hökmünde deňeşdirme hukugynyň esasy düşünjelerini we kategoriýalaryny öwrenmek. Häzirki zaman dünýäde hukuk maşgalalar, milli hukuk ulgamlaryň gurluşy we dünýä derejesinde hukugyň ösüşiniň esasy ugurlary barada bilimleri almak. Öňdebaryjy daşary ýurt döwletleriň hukuk biliminiň mazmuny, kazyýet ulgamy we hukuk ulgamlaryň aýratynlyklary bilen tanyşmak. Ýurisprudensiýa ugrunda geljekki hünär işi üçin hukugy deňeşdirip öwrenmegiň usullaryny ulanmaklygy başarmak.
Ykdysady hukuk dersiniň maksady - ykdysady hukugynyň esasy nazaryýet düzgünleri we kadalary bilen tanyşdyrmak; talyplaryň hünärli hukuk düşünjeliligiň ýokary derejesini gazanmak, okan wagtynda eýe bolan nazaryýet düzgünlerini häzirki zaman döwlet hukuk we hususy hukuk proseslerini seljerip, işinde dogry ulanmaga ukyplaryny ösdürmek, hereket edýän kanunçylygyň çylşyrymly ulgamyna düşünip, tejribede kadalaşdyryjy hukuk namalary takyk bir ýagdaýda ulanmak üçin özbaşdak dogry saýlap almak we dogry ulanmak ukyplaryny we başarnyklaryny ösdürmek, jemgyýetde döreýän ykdysady gatnaşyklary düzgünleşdirmekde ykdysady hukugyň ähmiýetine düşünmek, onuň düzgünleşdiriji ähmiýetini açyp görkezmek; ykdysadyýetiň we hukugyň özara baglanyşykly jemgyýetçilik-durmuş hadysalary hökmünde, olaryň derwaýys meselelerini, bazar ykdysadyýetiniň döwlet tarapyndan düzgünleşdirmesiniň ýörelgelerini, usullaryny we görnüşlerini, döwlet maliýesiniň hereket etmeginiň meselelerini we bazar ykdysadyýeti şertlerinde döwletiň ykdysadyýet we maliýe ulgamlaryna täsir edýän dürli ýagdaýlary (faktorlary) öwrenmek; ykdysady we maliýe hukuklarynyň esasy institutlary bolan maliýe, bank, salgyt, daşary ýurt pullary (walýuta), býujet, ätiýaçlandyryş, maýa goýum ýaly institutlarynyň mazmunyny açyp görkezmek.
Hukuk namalary hakynda Türkmenistanyň kanuny dersiniň maksady – bu ýörite ders hukuk namalaryny işläp taýýarlamagyň, hödürlemegiň, ara alyp maslahatlaşmagyň, kabul etmegiň, bellige almagyň, herekete girizmegiň, üýtgetmegiň we hukuk namalarynyň hereketini bes etmegiň we togtatmagyň, şeýle hem olary çap etmegiň tertibini öwredýär.
Administratiw hukuk bozulmalary hakyndaky kanunçylyk dersiniň maksady – administratiw hukugynyň, administratiw kanunçylygynyň esaslary barada ylmy bilimleriň ulgamyny döretmäge, dürli derejelerde ýerine ýetiriji düzümleriň ählisinde dolandyryş işini düzgünleşdirýän kadalaşdyryjy hukuk namalar bilen tejribede işlemekde olaryň hünärli (professional) hukuk iş ukybyny almaklaryna gönükdirilen.
Administratiw önümçilik kanunçylygy dersiniň maksady – bu ýörite ders administratiw edaralar tarapyndan administratiw namalarynyň kabul edilmegi, ýerine ýetirilmegi ýa-da ýatyrylmagy bilen bagly amala aşyrylýan işiň hukuk esaslaryny, ýörelgelerini we önümçilik düzgünlerini belleýär we adam hukuklarynyň we azatlyklarynyň berjaý edilmeginiň üpjün edilmegine hem-de kanunyň hökmürowanlygyna gönükdirilendir.
Türkmenistanyň Döwlet býujetiniň hukuk esaslary dersiniň maksady – maliýe hukugynyň esasy institutlarynyň biri bolan býujet ulgamynyň hukuk düzgünleşdirmesiniň mehanizmi baradaky meseleler boýunça öwretmek bolup durýar. Türkmenistanda býujet, maliýe-karz gatnaşyklarynyň hukuk esaslaryny kesgitleýän kanunlara we kanundan gelip çykýan hukuk namalaryny öwretmek. Dersde döwletiň býujet-maliýe, salgyt, pul we karz syýasatynyň esaslary, döwletimizde alnyp barylýan býujet işi barada, bazar ykdysady gatnaşyklar şertlerinde döwlet býujetiniň gurluş düzüminiň elektron maglumatlar, sanly ykdysadyýet ulgamlarynyň hukuk taýdan kadalaşdyrylyşy barada durulyp geçilýär.
Hukuk namalary hakynda Türkmenistanyň kanuny we Kanun çykaryjylyk işiniň tehnikasy dersiniň maksady – analitik we tejribe ukyplarynyň, başarnyklarynyň giň spektrine eýe bolan ýokary hünärli döwlet gullukçylaryny taýýarlamak bolup durýar. Türkmenistanyň Prezidentiniň ýanyndaky Döwlet gullugy akademiýasynyň diňleýjileriniň ýurisprudensiýanyň belli bir çygrynda tejribe bilimlerini özleşdirmek bilen utgaşykly kadalaşdyryjy hukuk namalaryny taýýarlamagyň kynçylyklaryna bir-bütewi, ulgamlaýyn garaýyşyň emele gelmegine esasy üns berilýär.
Administratiw önümçilik we Administratiw iş ýöredişi dersiniň maksady - beýleki kanunlaryň hatarynda onuň häsiýeti we döwlet dolandyryş çygrynda, döwlet edaralarynyň, ýerli öz-özüňi dolandyryş edaralarynyň, döwlet ygtyýarlyklaryny ýerine ýetirýän guramalaryň ýerine ýetiriji, serenjam beriji işiniň çygrynda önümçilik boýunça döreýän hukuk jemgyýetçilik gatnaşyklaryň wajyplygy bilen kesgitlenýär.
Maglumat hukugy dersiniň maksady – Berkarar döwletiň täze eýýamynyň Galkynyşy döwrüniň tejribesinden, häzirki zaman döwlet dolandyryşynda dolandyryş edaralarynyň ulgamynyň maddy-tehniki binýadynda, dolandyryş işiniň guralyşynda, iş ýörediş tertibinde elektron-sanly ulgamlaryň paýy artýar. Şoňa görä-de, biziň ýurdumyzda dolandyryş gatnaşyklaryny kämilleşdirmek üçin maglumat hukugynyň wajyp ähmiýeti bar.
Ýurdumyzda elektron iş ýörediş we resminamalar dolanyşygy ulgamynyň ornaşdyrylmagy dolandyrmagyň netijeliligini ýokarlandyrmaga goşant bolmak bilen, döwlet gullukçylarynyň zerur maglumatlary almagyny çaltlandyrmaga, gelýän-ugradylýan resminamalaryň dolanyşygyny tizleşdirmäge we gözegçilik etmäge, olaryň sazlaşykly we öz wagtynda ýerine ýetirilmegini üpjün etmäge oňaýly täsir edýär. Netijede, döwlet häkimiýet edaralarynyň elektron resminamalar dolanyşygy ulgamlaşdyrylýar we maglumatlar babatda özara gatnaşygy çalt amala aşyrmaga şertler döredilýär.
Administratiw önümçiligi dersiniň maksady - administratiw nama administratiw edara tarapyndan döwlet we raýat arasyndaky hukuk gatnaşyklar çygrynda belli bir (anyk) meseläni kadalaşdyrmak maksady bilen, daşky täsire eýe bolan we fiziki ýa-da ýuridik şahs üçin kesgitli hukuk netijelere getiren kabul edilen çözgüt, görkezme ýa-da gaýry häkimlik ediji çäredir. Şeýle hem bu Kanunyň giriş sözünde, görkezilen Kanunyň administratiw edaralar tarapyndan administratiw namalarynyň kabul edilmegi, ýerine ýetirilmegi ýa-da ýatyrylmagy bilen bagly amala aşyrylýan işiň hukuk esaslaryny belleýändigi barada aýdylýar. Diýmek, döwlet edaralary we olaryň wezipeli adamlary döwlet wezipelerini we wezipe ygtyýarlyklaryny amala aşyran wagtynda administratiw namalary çykarmak arkaly çözgütleri kabul edýärler. Başgaça aýdylanda, administratiw edaralaryň bir taraplaýyn häkimlik ediji häsiýetli administratiw çözgütleri olar tarapyndan diňe hukuk namalary çykarmak arkaly kabul edilýär hem-de hukuk namalar görnüşinde hereket edýär.
Administratiw jogapkärçiligi dersiniň maksady – administratiw hukuk bozulmany eden şahsy kanunlary berjaý etmek ruhunda terbiýelemek, şeýle hem hukuk bozujynyň hem özi, hem beýleki şahslar tarapyndan täze hukuk bozulmalarynyň edilmeginiň öňüni almak maksady bilen ulanylýar.
Daşary ýurt döwletleriniň administratiw hukugy dersiniň maksady – Daşary ýurt döwletleriniň administratiw hukugyna giriş. Daşary ýurt döwletleriniň administratiw hukugyna düşünje. Daşary ýurt döwletleriniň administratiw hukugyň predmeti. Administratiw hukugynyň obýekti we subýekti. Konstitusiýa barada düşünje. Administratiw hukugynyň ösüşi. Häzirkizaman Administratiw hukugynyň wezipeleri. Daşary döwletlerde döwlet dolandyrylyşynyň administratiw-hukuk esaslary. Döwlet gurluşy we olaryň görnüşleri. Döwlet dolandyryşynyň we düzgüniniň administratiw-hukuk esaslary. Döwlet dolandyryşy barada düşünje. Döwlet dolandyryşyň görnüşleri. Daşary döwletlerde raýatlyk düşünjesi. Daşary ýurtlarda döwlet baştutany. Daşary ýurt döwlet mehanizminde döwlet baştutanyň orny. Döwlet baştutanynyň ygtyýarlyklary. Daşary döwletleriň hökümeti. Hökümet barada umumy düşünje. Daşary döwletleriň hökümeti. Daşary döwletleriň hökümetiniň ygtyýarlyklary. Daşary döwletlerde ýerli öz-özüňi dolandyryş. Ýerli öz-özüňi dolandyryşyň umumy häsiýeti we ýörelgeleri. Ýerli öz-özüňi dolandyryşyň ulgamy. Ýerli öz-özüňi dolandyryşyň döredilişi. Ýerli öz-özüňi dolandyryş edaralarynyň ygtyýarlyklary. ABŞ-nyň, Beýikbritaniýanyň, Fransiýanyň, Germaniýanyň, Italiýanyň we Ispaniýanyň administratiw hukugynyň esaslary. Amerikanyň Birleşen Ştatlarynyň administratiw hukugynyň esaslary. Beýikbritaniýanyň administratiw hukugynyň esaslary. Fransiýa respublikasynyň administratiw hukugynyň esaslary. Germaniýa Federatiw Respublikasynyň administratiw hukugynyň esaslary. Italiýa Respublikasynyň administratiw hukugynyň esaslary. Ispaniýa korollygynyň administratiw hukugynyň esaslary. Demirgazyk Ýewropa döwletleriniň administratiw hukugynyň esaslary. Demirgazyk Ýewropa döwletleriniň administratiw kanunçylygynyň aýratynlyklary. Döwlet baştutanlary we ýerine ýetiriji häkimiýet. Arap we Latyn Amerikan döwletleriniň administratiw hukugy. Latinoamerikan administratiw hukugynyň aýratynlyklary. Latinoamerikan döwletleriň döwlet dolandyryşy we hökümeti. Garaşsyz Döwletleriň Arkalaşygy ýurtlaryň administratiw hukuk esaslary. Garaşsyz Döwletleriň Arkalaşygynyň döredilişi ýaly temalary öwredýär.
Maliýe we salgyt hukugy dersiniň maksady - Türkmenistanyň hereket edýän kanunçylygy esasynda maliýe hukugynyň mazmunyny, onuň aýratynlyklaryny, Türkmenistanyň býujet hukugyna giňişleýin häsiýetnama bermegi, bank hukugynyň ylmynyň predmetini we usulyýetini derňemegi, Türkmenistanyň maliýe hukugynyň instituty hökmünde, bank hukugynyň predmetini we hukuk düzgünleşdirmesiniň usulyny, bank, ätiýaçlandyryş, maliýe-hojalyk gatnaşyklarynyň hukuk düzgünleşdirme mehanizmlerini öwredýär.
Iş önümçiliginiň hukuk esaslary dersiniň maksady - iş önümçiligi. Iş önümçiliginiň ýöredilişi barada düşünje. Iş önümçiliginiň hukuk esaslary we iş ýörediş kadalary. Iş önümçilik. Edaranyň içki dolandyrylyşy. Işgärleriň şikaýatlaryna we ýüz tutmalaryna seretmegiň tertibi. Içerki namalar. Edaralaryň jogapkärçiligi.
Türkmenistanyň Ministrler Kabinetiniň ýanyndaky Baş arhiw müdirliginiň başlygynyň 2011-nji ýylyň 27-nji iýunynda çykaran № 17-IŞ buýrugy bilen tassyklanan “Türkmenistanyň ministrliklerinde, pudaklaýyn dolandyryş edaralarynda, guramalarynda iş dolandyryşy guramak boýunça” Düzgünnama. Şeýle hem bu Düzgünnamanyň üçünji böleginde Türkmenistanyň ministrlikleriniň, pudaklaýyn dolandyryş edaralarynyň, eýeçiligiň görnüşlerine we olaryň guramaçylyk-hukuk görnüşlerine garamazdan kärhanalaryň, edaralaryň we guramalaryň ählisi, şol sanda daşary ýurt maýa goýumlary bolan kärhanalar üçin dolandyryş işlerini resminamalaşdyrmaga we resminamalar bilen işlemegi guramaga, şol sanda kompýuter tehnikasynyň serişdeleri arkaly düzülýän resminamalary hem goşmak bilen, hökmany bolan umumy talaplary kesgitleýändigi barada aýdylýar.
Diýmek, döwlet edaralary we olaryň wezipeli adamlary döwlet wezipelerini we wezipe ygtyýarlyklaryny amala aşyran wagtynda iş ýörediş namalary çykarmak arkaly edaranyň içerki tertibini düzgünleşdirýärler.
