Golaýda paýtagtymyzdaky Olimpiýa şäherçesiniň Başa-baş söweş sungaty sport toplumynda geçirilen «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara serginiň hem-de ylmy maslahatyň çäklerinde Türkmenistanyň we daşary ýurtlaryň ýokary okuw mekdepleriniň arasynda hyzmatdaşlygy ösdürmek hakynda birnäçe degişli resminamalara gol çekildi. Forumyň çäklerinde Türkmenistanyň Prezidentiniň ýanyndaky Döwlet gullugy akademiýasynyň we Russiýa Federasiýasynyň Prezidentiniň ýanyndaky Russiýanyň halk hojalygy we döwlet gullugy akademiýasynyň arasynda hyzmatdaşlyk etmek hakynda Ylalaşyga gol çekildi. Hyzmatdaş bilim ojagynyň ýolbaşçylarydyr wekilleri ýurdumyza saparynyň çäklerinde bilim alýan ýokary okuw mekdebimize gelip gördüler. Russiýa Federasiýasynyň Prezidentiniň ýanyndaky Russiýanyň halk hojalygy we döwlet gullugy akademiýasynyň prorektory, ykdysady ylymlaryň doktory, professory A.M.Margolin mugallymlar we diňleýjiler üçin «Ählumumy trendler we durmuş-ykdysady ösüşiň ileri tutulýan ugurlary» atly tema boýunça umumy okuw sapagyny geçdi. Sapagyň ahyrynda özara sorag-jogap alşyldy.
Bilşimiz ýaly, halkara hyzmatdaşlyk akademiýanyň işiniň möhüm bölegi bolup durýar. Ýewropanyň, Aziýa yklymlarynyň, Garaşsyz Döwletleriň Arkalaşygynyň ugurdaş institutlary hem-de akademiki mekdepleri bilen hyzmatdaşlyk edip, daşary ýurtly professor-mugallymlaryň we halkara bilermenleriň gatnaşmaklarynda okuw derslerini geçmek diňleýjileri gaýtadan taýýarlamagyň esasy aýratynlygydyr. Şunuň bilen baglylykda, Döwlet gullugy akademiýasynyň we Birleşen Milletler Guramasynyň Ösüş maksatnamasynyň bilelikdäki taslamalarynyň çäklerinde birnäçe ýurtlaryň ugurdaş okuw mekdepleriniň professor-mugallymlarydyr hünärmenleri bilen adaty hem-de onlaýn görnüşdäki okuw sapaklary, synag okuwlary yzygiderli geçirilýär.
Ýeri gelende bellesek, Federal döwlet býujet ýokary bilim edarasy bolan Russiýa Federasiýasynyň Prezidentiniň ýanyndaky Russiýanyň halk hojalygy we döwlet gullugy akademiýasy (RHHweDGA) – ýurt boýunça 47 şahamçasy bolan Russiýanyň iri ýokary okuw mekdebidir. Russiýa Federasiýasynyň Prezidentiniň Permany bilen 2010-njy ýylda döredilen RHHweDGA dolandyryş, durmuş-ykdysady we ynsanperwer bilimi çygyrlarynda milli ylmy-okuw ekoulgamy hökmünde hereket edýär.
RHHweDGA-nyň ekoulgamyna 12 sany institutlar, 10 sany okuw merkezleri, 65 sany ylmy merkezler we institutlar, 47 şahamçalar, 14 sany kampuslar we liseý girýär. Döwlet dolandyryş we gullugy instituty Prezident akademiýasynyň iri ýokary okuw mekdebidir. Ol innowasion bilim merkezi bolmak bilen, Russiýada dolandyryjylaryň täze neslini kemala getirýär. Ykdysadyýet, matematika we maglumat tehnologiýalary instituty Russiýada ýokary bilim maksatnamalaryny dolulygyna onlaýn-ölçegde işläp taýýarlaýan we durmuşa geçirýän ilkinji institutdyr. Skillbox bilim platformasy onuň bakalawriat we magistratura onlaýn- bilim maksatnamalary boýunça hyzmatdaşy bolup çykyş edýär. «Döwlet dolandyryşynyň ýokary mekdebi» instituty döwlet dolandyryş ulgamy üçin dolandyryjy işgärleri taýýarlamagy, gaýtadan taýýarlamagy we olaryň hünär derejesini ýokarlandyrmagy üpjün edýär, ähli derejede işgärler ätiýaçlygyny kemala getirýär we ösdürýär. Milli howpsuzlyk we hukuk instituty RHHweDGA-nyň iri okuw-ylmy düzümleriniň biri bolmak bilen, bu ýokary okuw mekdebinde milli howpsuzlyk, hukukşynaslyk we gümrük işi çygrynda hünärmenler taýýarlanýar. Dolandyryş we sebitleriň ösüşi instituty hem Prezident akademiýasynyň ekoulgamyna girýär. Akademiýanyň Maliýe we durnukly ösüş instituty üznüksiz bilimiň doly toplumyny berýär. Ol orta, ýokary we goşmaça bilim maksatnamalaryny yzygiderli iş ýüzünde durmuşa geçirýän ýokary okuw mekdebi bolup durýar. Şeýle-de Prezident akademiýasynyň ekoulgamyna bilimi ösdürmegiň federal instituty girýär. Ol Russiýa Federasiýasynda bilimi ösdürmegiň esasy çygyrlaryna gözegçilik edýär we dolandyrýar.
Akademiýanyň maliýe we bank işi fakulteti dünýäniň iň gowy ýokary okuw mekdepleri bilen hyzmatdaşlykda degişli bilim maksatnamalary boýunça milli we ählumumy derejede maliýe çygrynyň hünärmenlerini taýýarlaýar. Ykdysady we sosial bilimleri fakulteti – iri uniwersitet Taslama merkezidir: bu ýerde her ýylda 80-90 sany rus we daşary ýurt taslamalary işlenip taýýarlanýar. Şeýle-de RHHweDGA-da halkara synaglaryny iňlis dilinde kabul etmek boýunça awtorlaşdyrylan merkez hereket edýär.
2011-nji ýylda RHHweDGA «Russiýany 2020-nji ýyla çenli durmuş-ykdysady taýdan ösdürmek boýunça Strategiýanyň» başyny başlaýjy we guramaçysy bolup çykyş edýär. 2017-nji ýylda Russiýa Federasiýasynyň Hökümeti RHHweDGA-na alymlyk derejesini özbaşdak bermäge rugsat berýär. Russiýanyň Bilim we Ylym ministrligi 2022-nji ýylyň 21-nji dekabrynda «Prioritet 2030» maksatnamasyny tassyklaýar. Onuň çäklerinde Akademiýada strategik konsalting Merkezi işläp başlaýar. Beýan edilen düzümler Prezident akademiýasynyň gurluşynyň doly bolmadyk sanawydyr.