21-nji fewralda Türkmenistanyň Prezidentiniň ýanyndaky Döwlet gullugy akademiýasynda professor-mugallymlaryň we diňleýjileriň gatnaşmagynda Türkmenistanyň Goranmak ministrliginiň Baş raýat goranyşy we halas ediş işleri müdirliginiň hünärmenleriniň okuw sapagy geçirildi. Duşuşygyň maksady döwlet gullukçylaryny raýat goranyş we halas ediş babatynda ýurdumyzda alnyp barylýan işler bilen tanyşdyrmakdan, tebigy betbagtçylygyň öňüni almakda, meýilnamalaýyn işleri öz wagtynda ýerine ýetirmekde toplanan tejribeleri diňleýjilere amaly taýdan öwretmekden ybarat bolup durýar.
Okuw sapagynyň dowamynda Türkmenistanyň Goranmak ministrliginiň Baş raýat goranyşy we halas ediş işleri müdirliginiň hünärmeni häzirki wagtda ýüze çykýan adatdan daşary ýagdaýlaryň görnüşleri, hususan hem tebigy we tehnogen häsiýetli howplar ýüze çykanda raýat goranyşy guramak, onuň aýratynlyklary we halas ediş işleri barada belläp geçdi. Şeýle-de duşuşykda dünýäniň dürli sebitlerinde tebigy we tehnogen häsiýetli howplaryň ýüze çykmagy bilen emele gelen adatdan daşary ýagdaýlar, şeýle ýagdaýlar ýüze çykan halatynda özüňi alyp barmagyň we tebigy betbagtçylyklardan goranmagyň endiklerini we ukyplaryny kämilleşdirmek barada aýdyldy. Maslahatyň dowamynda edilen çykyşlarda ýüze çykmak töwekgelçiligi bolan adatdan daşary ýagdaýlaryň öňüni almaga we ýok etmäge, ilatyň ýaşaýyş-durmuş şertlerini howpsuzlandyrmaga, aýratyn möhüm we howply desgalaryň, maddy we medeni gymmatlyklaryň goraglylygyny üpjün etmäge, umumy döwlet ähmiýetli wezipeleri utgaşdyrmaga gönükdirilen “Raýat goranyş çygrynda döwlet syýasatynyň esasy ugurlaryny 2019-2030-njy ýyllar aralygynda durmuşa geçirmegiň Döwlet maksatnamasyna”, “Türkmenistanyň seýsmik töwekgelçiligi peseltmek” hakyndaky maksatnamasyna bagyşlanan çykyşlaryň dowamynda ýörite taýýarlanan slaýdlar hem görkezildi. Döwlet gullukçylaryny ýokary derejede taýýarlykly, kämil hünärmenler edip ýetişdirmek maksady bilen guralan bu okuw sapagy diňleýjilerde raýat goranyşyň esaslaryny has-da gowy öwrenmäge mümkinçilik döretdi.
Duşuşyga gatnaşyjylar asuda, parahat ýurtda ýaşandyklary üçin buýsançlaryny beýan edip, Berkarar döwletiň täze eýýamynyň Galkynyşy döwründe eşretli durmuşyň hözirini görüp ýaşamak bagtyny peşgeş beren Gahryman Arkadagymyza, hormatly Prezidentimize çäksiz sagbolsun aýtdylar.