2021-nji ýylyň 09-njy aprelinde Türkmenistanyň Prezidentiniň ýanyndaky Döwlet gullugy akademiýasynda Ýerine ýetiriji häkimiýetiň ýerli edaralarynyň we ýerli öz-özüňi dolandyryş edaralarynyň gullukçylarynyň hünär derejesini ýokarlandyrmak boýunça okuwlarynyň (okuwyň möhleti iki aý) üçinji möwsümini üstünlikli tamamlan diňleýjilere şahadatnama gowşurmak dabarasy geçirildi.
Çykyşlarda bellenilişi ýaly, diňleýjiler dolandyryş, ykdysadyýet, hukuk, ynsanperwer we beýleki ugurlar boýunça bilimlerini kämilleşdirdiler. Okuwlaryň dowamynda özleşdirilen sapaklar geljekde olara alyp barýan işlerini sazlaşykly ýola goýmaga ýardam berer.
Dabaraly çäräniň ahyrynda oňa gatnaşýanlar hormatly Prezidentimiziň janynyň sag, ömrüniň uzak bolmagyny, ýurdumyzyň abadançylygynyň hem-de ählumumy ösüşiň bähbidine gönükdirilen işleriniň mundan beýläk-de üstünliklere beslenmegini tüýs ýürekden arzuw etdiler.