2023-nji ýylyň 30-njy dekabrynda Türkmenistanyň Prezidentiniň ýanyndaky Döwlet gullugy akademiýasynda täjirçilik arbitražy boýunça döwlet gullukçylarynyň hünär derejesini ýokarlandyrmak okuwyny (okuwyň möhleti dört aý) tamamlan diňleýjilere şahadatnama gowşuryldy. Okuw meýilnamasyna laýyklykda diňleýjiler «Türkmenistanyň Konstitusiýa hukugy», «Türkmenistanyň durmuş-ykdysady ösüşiniň döwlet kadalaşdyrylyşy», «Adminstratiw hukugy», «Maliýe we bank hukugy», «Jenaýat hukugy», «Halkara hukugy», «Halkara hususy hukugy», «Raýat hukugy», «Kommersiýa arbitražy», «Telekeçilik hukugy», «Halkara hususy hukugy», «Dolandyryş psihologiýasy», «Döwlet gullukçysynyň etikasy we işewür gatnaşyklary», «Sanly ykdysadyýet we döwlet dolandyryşynda sanly ulgamlar», «Buhgalterçilik hasaby, audit we maliýe hasabatlylygyň halkara standartlary», «Hili dolandyrmak we INKOTERMS», «Daşary ykdysady aragatnaşyklar», «Geosyýasat» atly dersleri özleşdirdiler.
Döwlet gullukçylarynyň hukuk taýdan düşünjeliliginiň derejesi ýokary bolmalydyr. Muny hukuk sowadynyň we terbiýesiniň işjeňligini güýçlendirmek arkaly gazanyp bolýar. Şu nukdaýnazardan, Türkmenistanyň Prezidentiniň ýanyndaky Döwlet gullugy akademiýasynda milli kanunçylyk bilen dersleriniň okuw maksatnamalaryna girizilip, ders hökmünde okadylmagy örän wajyp ähmiýete eýedir.
Mälim bolşy ýaly, Türkmenistanda adamyň we raýatyň Konstitusiýada hem-de kanunlarda kepillendirilen hukuklaryny, azatlyklaryny goramak döwlet syýasatynyň baş maksady bolup durýar. Häzirki wagtda Türkmenistanyň ençeme halkara şertnamalara, ylalaşyklara we konwensiýalara goşulmagy bilen, olarda beýan edilen halkara hukuk kadalary milli kanunçylygymyza ornaşdyryldy. Türkmenistanyň raýat kanunçylygy gatnaşyjylaryň deňhukuklylygy, eýeçiligiň eldegrilmesizligi, şertnama erkinligi, kimdir biriniň hususy işlere esassyz gatyşmagyna ýol berilmezligi, raýat hukuklarynyň päsgelçiliksiz amala aşyrylmagy, bozulan hukuklaryň dikeldilmegi, olaryň kazyýet goragynyň üpjün edilmegi ýaly ýörelgelere esaslanýar. Döwlet gullukçylarynda hukuk taýdan aň-düşünjeliligi kämilleşdirmäge gönükdirilen ýokardaky temalar okuwyň dowamynda öz beýanyny tapdy.
Türkmenistanyň Prezidentiniň ýanyndaky Döwlet gullugy akademiýasynda diňleýjileriň alan bilimleri olary täze belentliklere ruhlandyrar. Dabaraly çärede eziz Watanymyzy beýik ösüşlere besleýän Gahryman Arkadagymyza hem-de Arkadagly Gahryman Serdarymyza tüýs ýürekden egsilmez alkyş aýdyldy.