11-nji sentýabrda Türkmenistanyň Prezidentiniň ýanyndaky Döwlet gullugy akademiýasynda ýurdumyzyň mukaddes Garaşsyzlygynyň 34 ýyllygy, hemişelik Bitaraplygymyzyň 30 ýyllygy, şeýle-de arhiw gullugynyň döredilmeginiň 100 ýyllygy mynasybetli “Resminamalary dolandyrmak we olaryň ýazuw kadalary” dersi boýunça göçme okuw sapagy geçirildi. Oňa akademiýanyň mugallymlary we diňleýjileri gatnaşdylar.
Okuw sapagynyň dowamynda Türkmenistanyň Merkezi döwlet arhiwiniň Resminamalary peýdalanmagy guramak bölüminiň müdiri Elida Džawagirýan arhiw işiniň alnyp barlyşy, bu ýerde resminamalaryň toplanyşy, saklanyşy, hasaba alnyşy, peýdalanylyşy dogrusynda çykyş etdi, şeýle-de ýurdumyzyň taryhyna degişli bolan gadymy fotosuratlaryň nusgalary boýunça taýýarlanan göçme sergi bilen tanyşdyrdy. Çykyşyň dowamynda Türkmenistanda arhiw ulgamynyň kämilleşdirilmegi boýunça hereket edýän kanunçylyk namalar, 1941-1945-nji ýyllaryň Beýik Watançylyk urşunda gaýduwsyzlyk görkezen mert ýigitlerimiziň, tylda zähmet çeken edermen zenanlarymyzyň gahrymançylyklary, mukaddes Garaşsyzlygymyzyň, hemişelik Bitaraplygymyzyň halkymyza eçilen miweleri we taryhyň bu beýik sahypalarynyň geljekki nesillerimize ýetirilmegi ugrunda alnyp barylýan işler dogrusynda hem gyzykly gürrüňler edildi. Çykyşda bellenilişi ýaly, her bir döwletde halkyň milli ýazuw mirasynyň aýawly saklanmagyna uly ähmiýet berilýär. Çünki bu babatdaky arhiw resminamalary halkyň taryhyny beýan edýän milli ruhy baýlykdyr. Garaşsyzlyk ýyllarynda ýurdumyzda bolup geçen syýasy we ykdysady özgerişler Türkmenistanyň arhiw ulgamynyň işine hem-de onuň soňraky ösüşine hem oňaýly täsirini ýetirip, bu ugurdaky işlere giň gerim berdi. Arhiw ulgamynyň döwrebaplaşdyrylmagy, arhiw resminamalarynyň sanlylaşdyrylmagy bolsa hünärmenlerimizi täze-täze zähmet üstünliklerine ruhlandyrýar.
Okuw sapagynyň ahyrynda oňa gatnaşyjylar milli mirasymyzy gorap saklamakda we olary geljekki nesillere ýetirmekde bimöçber tagallalar edýän Gahryman Arkadagymyza we Arkadagly Gahryman Serdarymyza çäksiz sagbolsun aýtdylar.