2026-njy ýylyň 19-njy iýunynda Gazagystan Respublikasynyň Döwlet gullugy işleri boýunça agentliginiň ýolbaşçylygynda Astana şäherinde «Adam. Mümkinçilikler. Sanlylaşdyrma we emeli aň eýýamynda jemgyýetçilik gymmatlyklary» temasy boýunça «GovHR Forum-2026» halkara maslahaty geçirildi.
Bu halkara çärä dünýäniň dürli ýurtlaryndan döwlet dolandyryşy ulgamynyň ýolbaşçylary, IT hünärmenleri, şeýle hem sanlylaşdyrma we emeli aň ulgamy boýunça bilermenler gatnaşdylar. Maslahat döwlet gullugyny ösdürmegiň häzirki zaman çemeleşmelerini ara alyp maslahatlaşmak we tejribe alyşmak üçin möhüm meýdança öwrüldi. Çärä dürli halkara guramalar bilen birlikde, 20-den gowrak ýurtdan, şol sanda Türkmenistandan, BAE-den, Rumyniýadan, Hytaýdan, Beýik Britaniýadan, Azerbaýjandan, Gonkongdan, Iordaniýadan, Ermenistandan, Kiprden, Gyrgyzystandan, Mongoliýadan, Täjigistandan, Özbegistandan, Finlýandiýadan, Singapurdan we beýleki hyzmatdaş döwletlerden wekiller we öňdebaryjy bilermenler gatnaşdylar. Ýeri gelende, forumyň işine Türkmenistanyň Prezidentiniň ýanyndaky Döwlet gullugy akademiýasyndan hem wekiliýetiň gatnaşandygyny bellemeli. «GovHR Forum-2026» halkara forumyň çäklerinde bilermenler adam maýasyny kämilleşdirmek, dolandyryş ulgamyna sanlylaşdyrmany we emeli aňy ornaşdyrmak, korrupsiýanyň öňüni almak, döwlet hyzmatlarynyň hilini ýokarlandyrmak meselelerini ara alyp maslahatlaşdylar.
Forumyň barşynda, Gazagystanyň Döwlet gullugy işleri boýunça agentliginiň başlygy Darhan Žazykbaý çykyş edip, ýurtda amala aşyrylýan konstitusion we institusional özgertmeleriň hyzmatdaşlyga we raýatlara gönükdirilen döwlet dolandyryşynyň täze pelsepesini emele getirendigini nygtady. Maslahatda ýurtda “Döwlet gullugy hakyndaky” täze Kanunyň kabul edilmegi, şeýle-de döwlet gullukçylarynyň sanly başarnyklaryny ösdürmek maksady bilen, “AI Qyzmet” maksatnamasynyň çäklerinde 52 müňden gowrak administrtiw işgäriň emeli aň gurallary boýunça okuw geçendigi barada aýdyldy. Şeýle hem bellenilişine görä, ýurtda «Alem.cloud» milli superkompýuteri we 100-den gowrak awtomatlaşdyrylan agenti öz içine alýan döwlet emeli aň platformasy işe girizildi. Gazagystanda korrupsiýa garşy göreş boýunça halkara standartlara laýyk gelýän täze bäş ýyllyk strategik resminamanyň taýýarlanyp başlanandygy mälim edildi.
Maslahatyň dowamynda akademiýanyň wekilleri foruma gatnaşan halkara bilermenler hem-de beýleki ýurtlaryň dolandyryş akademiýalarynyň wekilleri bilen netijeli pikir alyşdylar. Munuň özi sanlylaşdyrma we emeli aň eýýamynda döwlet gullukçylaryny taýýarlamagyň iň döwrebap hünär standartlaryny, halkara tejribelerini we ylmy esaslaryny jemläp, ony milli okuw-terbiýeçilik işlerine ornaşdyrmaga ýardam berer.