20-nji iýunda Türkmenistanyň Prezidentiniň ýanyndaky Döwlet gullugy akademiýasynyň uly mugallymy Hajymyrat Pirmuhamedow Gazagystanyň paýtagty Astana şäherine iş saparyny amala aşyryp, “GovHR: täze ulgamlar, döwrebap hyzmatlar, innowasion çözgütler” atly halkara foruma gatnaşdy.
Adam serişdelerini dolandyrmakda öňdebaryjy tejribäni öwrenmäge bagyşlanan halkara çäre, her ýylyň 23-nji iýunynda bellenilýän Birleşen Milletler Guramasynda döwlet gullugynyň gününiň öňüsyrasynda geçirildi.
Forum dolandyryş ulgamynda tejribeleri paýlaşmakda, döwrebap tehnologiýalary ulgama ornaşdyrmak we bu ugurdaky innowasion çemeleşmeler hakynda netijeli gepleşikleri geçirmekde, özara gatnaşyklaryň geljekki mümkinçilikleri babatda ileri tutulýan garaýyşlary mälim etmekde uly ähmiýete eýe boldy.
Forumyň dowamynda döwlet gullugyny gowulandyrmak, adam serişdelerini dolandyrmagyň ygtybarly ulgamyny döretmek, onuň alnyp barylýan işlere edýän täsiri, bütin dünýäde dolandyryjylarda bolmaly esasy başarnyklar, işgärleriň zehinini kämilleşdirmek meseleleri ara alnyp maslahatlaşyldy. Halkara foruma gatnaşyjylar bu ugurda innowasiýalary ornaşdyrmakda tejribe alyşmagyň möhümdigini bellediler.