Hormatly Prezidentimiz Serdar Berdimuhamedowyň öňdengörüjilikli ýolbaşçylygynda ýurdumyzda döwlet gullukçylarynyň hünär derejesini yzygiderli ýokarlandyrmaga aýratyn üns berilýär, bu ugurda dünýäniň öňdebaryjy tejribesi öwrenilip, durmuşa ornaşdyrylýar. Şu nukdaýnazardan, 23 — 25-nji iýun aralygynda Türkmenistanyň Prezidentiniň ýanyndaky Döwlet gullugy akademiýasynyň wekilleri Özbegistanyň Samarkant şäherinde BMG-niň Ykdysady we durmuş meseleleri boýunça departamentiniň (UN DESA) guramagynda geçirilen döwlet gullugyny we dolandyryşy kämilleşdirmek boýunça halkara forumyna gatnaşdylar.
Forum döwlet gullugyny özgertmek, dolandyryşda sanly tehnologiýalary ösdürmek we bu ugurda halkara hyzmatdaşlygyny pugtalandyrmak meselelerini ara alyp maslahatlaşmakda uly ähmiýete eýe boldy.
Türkmenistanyň Prezidentiniň ýanyndaky Döwlet gullugy akademiýasynyň wekili «Üýtgeşmeler arkaly dolandyryş: häzirki zaman döwlet gullugynyň strategiýalary» atly seminaryň çäginde ýurtda sanly ykdysadyýetiň esaslaryny döretmek we bu ugurda hukuk kadalaryny işläp düzmek boýunça toplanylan tejribeler barada gürrüň berdi. Bellenilişine görä, döwlet edaralarynda, kärhanalarda we guramalarda maglumat-aragatnaşyk tehnologiýalarynyň ornaşdyrylmagy boýunça toplumlaýyn işler alnyp barylýar. Maddy-tehniki binýat yzygiderli pugtalandyrylyp, elektron resminama dolanyşyk ulgamy we iş usullarynyň täze görnüşleri girizildi.
Türkmenistanyň Prezidentiniň gol çeken Kararlary esasynda sanly ykdysadyýeti ösdürmek boýunça pudagara toparyň döredilmegi hem-de elektron resminama dolanyşygy ulgamynyň ornaşdyrylmagy ýurtda sanly özgertmelere itergi berdi. Bu toparyň maksady döwlet we jemgyýetçilik durmuşynyň ähli derejelerinde sanly tehnologiýalaryň ornaşdyrylmagyna ýardam bermekden ybaratdyr. Kabul edilen çözgütleriň esasynda ministrliklerde, pudaklaýyn dolandyryş edaralarynda, welaýatlaryň we Aşgabat şäheriniň häkimliklerinde elektron resminama dolanyşygynyň ulgamlary hem-de resmi web saýtlary döredildi.
Sanly platformalaryň ösüşi Türkmenistanda 2019 – 2025-nji ýyllarda sanly ykdysadyýeti ösdürmegiň Konsepsiýasy we 2021 – 2025-nji ýyllar üçin degişli çäreler meýilnamasy bilen tassyklanan Döwlet maksatnamasynyň çäklerinde amala aşyrylýar. 2024-nji ýylyň maý aýynda «Türkmenistan – BMG» Strategik maslahat beriş geňeşiniň täzelenen düzüminiň ilkinji mejlisi geçirildi. Bu mejlisde 2026 – 2030-njy ýyllar üçin hyzmatdaşlygyň Çarçuwaly Maksatnamasyny taýýarlamak boýunça ýol kartasy kabul edildi.
Şunuň bilen baglylykda, Akademiýanyň wekilleriniň Özbegistan Respublikasynda geçirilen giň gerimli halkara forumyna gatnaşmagy, ýurdumyzda täze innowasion tehnologiýalaryny, sanly platformalary ulanyp, ýokary derejeli döwlet gullukçylaryny taýýarlamaklyga aýratyn üns berýändigini we bu ugurda dünýäniň öňdebaryjy oňyn tejribesini durmuşa ornaşdyrýandygyny görkezýär.